政壇：搞搞政：上司升官 陳智遠擦鞋都唔識

官場執位，食物及衞生局前副局長梁卓偉（Gabriel）坐白金升降機直上特首辦主任，食衞局局長政治助理陳智遠（Paul）尋日講到前老闆升職時好謹慎，可惜好似不諳官場文化，佢好唔捨得Gabriel，咁有冇咩多謝對方呢？陳智遠竟然口啞啞、講唔出。唉，人在官場講好話都少不了嘅喇，陳智遠竟然連賣口乖、擦鞋都慳番，真係需要再浸吓囉。

講開又講，Gabriel同阿Paul喺食衞局時都好friend吓，不時同出同入，好似舊年年尾咁，我哋就喺中環ifc撞到佢哋兩個疑似孖咇shopping完。尋日我哋問阿Paul對於Gabriel離開食衞局有咩感受，阿Paul形容Gabriel係一位好老闆，相信會為Gabriel舉行歡送活動。

雖則過去三年，食衞局嘅政績始終差強人意，但Gabriel同阿Paul總算合作無間。我哋問阿Paul有咩想多謝Gabriel，阿Paul只係簡單拋低句「盡在不言中」。如果阿Paul醒目的話，可以話從Gabriel身上學到好多嘢，希望Gabriel新工工作順利諸如此類，依家阿Paul咁講，咪盞引嚟更多遐想！