政壇：唐唐鬼祟落區避出醜
唐英年辭職之後，雖然口口聲聲話要考慮係咪參選，整出一幅猶抱琵琶半遮面嘅樣，但有傳佢嘅選舉機器早已全力開動，仲搵埋公關公司籌備宣傳，仲因應唐唐嘅資質大搞秘密落區添，據講唔少活動都唔會安排傳媒採訪，費事畀人狙擊兼問到口啞啞，一陣衰多兩錢重。
唐唐開口夾着脷，公關嘅絕招就係避免佢把口再失分，而且有傳佢哋認為依家啲示威者傾向用比較激烈嘅手法示威，為免唐唐出醜滿面通紅咁上鏡，或者變臉黑口黑面，秘密行動就最安全，只有事後好似國務院副總理李克強訪港安排咁，選擇性發放新聞稿、相片及影片，就掂喇。
不過，佢想鬼祟，網民就唔係咁諗，有網民就爆唐唐遲吓會去佢學校探訪，佢叫網友教路睇吓到時點樣當面質詢唐唐，結果其他網民踴躍發表意見，有人好勞氣話一個只識飲紅酒同條條fing嘅人點可以做特首﹖