政壇：林公公升旗禮站姿騎呢
有「人肉錄音機」之稱嘅林公公林瑞麟紮職做政務司司長後，好多市民都話一肚氣，尋日佢首度以政務司司長身份出席十．一升旗禮，就有睇唔過眼嘅市民投訴，話佢禮儀不周失禮人，雖然市民嘅講法值得商榷，但林公公不得人心於此可見一斑。
事緣林公公出席升旗禮時，站姿別樹一格，因為佢哋係企喺最前排嘅官員，各人升旗時大都雙手垂直腿側，唯獨林公公卻好似大老闆咁，背雙手喺身後，狀甚傲慢。我哋問過熟悉升旗儀式嘅人，佢話觀看升旗禮冇規定要將雙手垂直，林公公雙手放後亦無乜問題，只要企得正、無藐嘴藐舌，或者雙手翹喺胸前就得。至於市民投訴佢冇敬禮，有關人士就話，林公公唔係制服團隊成員，唔需要敬禮咁誇張。
林瑞麟（左）好似大老闆咁孭手出席升旗禮，被指唔夠尊重。