政壇：短命施政報告煲呔曾賣膏藥

近排政圈好熱鬧，但焦點係疑似特首選舉口水戰，搞到一年一度嘅《施政報告》都冇人騷，早排有調查更顯示大部分受訪市民都話對呢份報告冇乜期望，仲有人譏諷呢份報告只得半年壽命，有乜值得睇！結果政圈冷待搞到慣咗頤指氣使嘅煲呔曾大感冷落同寂寞，尋日出席十一酒會時竟然大玩騎劫招數，喺致詞後段為自己份最後報告大賣廣告，竭盡全力咁爭取政圈關注，真係幾肉酸！

錯講「貧窮懸殊」

《施政報告》從來都係政圈同全港焦點，因為報告為香港制訂未來一年甚至多年嘅發展大方向，一齊發表嘅施政綱領更細錄特區政府未來嘅工作。不過，已經開始倒數執包袱嘅煲呔曾今年份報告係任內最後一份，加埋出年適逢特首換屆，新班子新作風，仲有邊個理佢呢份短命報告呢？

有議員私底下講起件事時舉例話，為政府揸莊嘅疑似新人同舊人雖然都喺枱面，但你會關心只得半年有效期嘅現金單定係可以喺未來五至十年兌現嘅大支票呢﹖雖然張支票係期票，但起碼畀人一份刺激同希望，所以今年真係提唔起興趣關心《施政報告》。就係咁，官場冇人放風、政界冇人唧噚，煲呔曾惟有自己賣廣告，預先張揚份報告喺房屋、貧富懸殊同人口老化問題都有着墨，點知佢又講錯為「貧窮懸殊」，真係賣狗皮藥膏都搞錯。

至於佢將會發表報告嘅立法會添馬艦新大樓，就緊密進行會議設施測試工作，嚟緊嘅四號就會開一個綵排會議，暫時未知有幾多議員會出席。不過，立法會主席就話咗會出席主持「大會」，其實，煲呔曾咁想出風頭，應該撥冗出席綵排大會博上鏡吖嘛。