升官毋須補缺 副局可有可無

官場近排熱鬧過做大戲。唐英年辭職專心選特首，港府高層大執位，政制及內地事務局局長林瑞麟水鬼升城隍，接任政務司司長，空缺由特首辦主任譚志源補上，而「大內總管」特首辦主任就由食物及衞生局副局長梁卓偉頂上。

俗語話，鐵打嘅衙門，流水嘅官，有人走，就梗係有人替，呢啲好正常嘅啫。問題係，梁卓偉留低副局長個位邊個坐呢？正如歌仔所唱：「只得一張空櫈。」呢張空櫈幾時先至有人坐，港府冇公布，不過睇嚟呢首《空櫈》當局會繼續唱落去。

正所謂，軍不可一日無帥。食衞局同民生息息相關，有乜甩漏後果可大可小，梁卓偉假假地都算「副帥」，佢升官咯喎，按道理應該快快趣趣搵人頂佢副局長個位至係o架，點可以就咁擺張空櫈呢？

其實副局紮職冇補缺，都唔係第一次喇。記得蘇錦樑嗎？呢位醜聞纏身嘅商務及經濟發展局原副局長，升任局長之後，副局長個位懸空咗三個幾月，依家仲未有人接替，問你服未。

叮！副局長可有可無，對部門運作完全冇影響，簡直匪夷所思。咁唔係因為正局長有本事，一個可以頂兩個，而係證明副局長個位根本係多餘嘅，盞嘥公帑。

話時話，煲呔曾藉擴大問責制之名，行招攬「曾家軍」之實，大拿拿每年使幾千萬請班副局長同政治助理，莫講做過乜冇人講得出，連佢哋姓甚名誰，絕大部分市民到依家仲係矇查查。呢班政壇新貴除咗不斷製造醜聞，就冇任何貢獻。

講開醜聞，搞到雞犬不寧嘅「僭建風波」，就有兩個副局長中招。先有環境局副局長潘潔被踢爆大埔三層高村屋有僭建，跟手又輪到已升做局長嘅蘇錦樑麥當勞道住所被揭發存在多項僭建。高官其身不正，又點可能強政勵治喎！

冇計喇，副局政助本來就係「政壇僭建物」，係煲呔曾親疏有別、任人唯親、黑箱作業嘅怪胎，當初一出嚟就爆「八國聯軍治港」同薪酬保密嘅醜聞，搞到滿城風雨。港府漠視民意，對添煩添亂嘅副局政助不離不棄，攞納稅人嘅血汗錢嚟做人情，簡直豈有此理！

港府成日話「以民為本」，計太一叮話齋，講多無謂，食多會滯，為納稅人荷包着想，重新檢討問責制，炒晒班副局政助，每年慳番幾千萬，益吓貧困長者，咁就真係以民為本喇，叮！