政壇：搞搞政：納沙吹毀鐵頭仁阿基大計

日前納沙襲港，天文台忽發八號風球訊號，打亂好多預先安排嘅活動，白鴿黨主席鐵頭仁同民協馮檢基更係受害者，事關佢哋當日都約咗傳媒，一個想講特首選舉、一個想吐區選畀人民力量狙擊嘅苦水，點知納沙一到，乜都唔使講。阿基尋日雖然補番數，但係撞啱外傭居港權裁決同官場大執位，佢想呻苦都未必有人聽！

佢哋兩個都係泛民圈中視為特首選舉嘅挑戰者，近排特首選舉爆口水戰，好多可能或有啲疑似嘅人選都畀人追問反應，佢哋卻無人問津，好似透明咁。據講，原因同佢哋報名參加區選有關，唔少媒體都驚如果搵佢哋講特首選舉，可能唔覺意觸碰咗區選嘅宣傳界限，所以寧願漠視泛民參選人呢個問題。

不過，佢哋兩個冇人騷，兩大熱門嘅聚焦度就一樣咁強，尋日行政會議成員張炳良以香港教育學院校長身份出席教院活動時，就被追問佢係唐營定係梁營，張炳良故弄玄虛話自己係梁營，正當大家以為有單張炳良明撐梁振英嘅新聞時，佢卻即刻澄清，自己講嘅係良好嘅「良」，即捧優良嘅候選人咁解喎。

另外，盛傳支持CY嘅恒隆主席陳啟宗尋日出席一項活動時，指下屆特首須着手解決香港嘅深層次矛盾，包括貧窮問題、房屋問題、金融服務業競爭力下降等，全部都係CY主打嘅競選議題，明顯語有所指。