政壇：新立會黑玻璃現鬼影
煲呔曾死趕爛趕入添馬艦新政府總部，仲為咗喺立法會新大樓「歷史性」宣讀佢最後一份施政報告，搞到工程甩甩漏漏，尋日立法會秘書長吳文華（Pauline）仲即場發現記者攝影房嘅玻璃太黑，搞到攝影記者要影議員喺議事堂工作難上難，唔單止議員變咗鬼影，照片效果仲矇查查添，結果又要拆玻璃喇！
新大樓嘅裝修工程已經七七八八，但攝記去到攝影房一睇，立即發現分隔攝影房同會議廳嘅玻璃顏色太深，加上為咗隔音，部分攝影房裝咗兩塊玻璃，影出嚟相片鬼影幢幢。Pauline知道問題後，一個下晝就決定將兩塊玻璃還原到一塊，並會撕走玻璃表面嘅保護遮光膜，同時會加強會議廳及各會議室嘅燈光，改善問題。
吳文華獲悉玻璃太黑後，即刻同攝記商量點樣解決。