政壇:林公公寸爆鬍鬚曾

官場音樂椅尋日響個不停,民望超低嘅政制及內地事務局局長林瑞麟獲中央委任,接棒做政務司司長,仲帶挈譚志源、梁卓偉升官,有人歡喜有人愁,財爺鬍鬚曾就轉過頭攞假避開吓,仲由今起放到施政報告發表前三日先返工,特首選舉同政務司司長都冇佢份,雙失已經令佢倍感老貓燒鬚啦,仲要再聽林公公寸句「我只係植入一條心臟支架」,暗指唔似嗰啲三條血管都塞嘅人,難怪佢冇眼睇,要即刻放假去散心喇!

好過鬍鬚曾植三支架

尋日政府宣布連串高官人事任命,官場有新人笑,當然都有舊人閉翳,政府憲報就同日公布,鬍鬚曾由今日起放假九日,直到十號先返工,如果唔係施政報告公布,唔知鬍鬚曾係咪要放耐啲假呢?早前我哋都同大家預報過,鬍鬚曾雖然被視為曾兄弟,但係新一波官場升遷中卻冇人騷佢,近排疑似特首口水戰日日開打,有冇人提過鬍鬚曾?答案梗係冇。

到尋日林瑞麟又接任政務司司長,由此亦可以透視下屆特區政府中鬍鬚曾都應該行人止步。兩邊都冇着落,鬍鬚曾冇面又畀人剃鬚,唔收埋自己都日子難過喇!

講番林公公升官時大談自己早前做心臟手術,只係植入咗一支金屬支架,仲話比起嗰啲兩、三支嘅少好多。講緊邊個?係人都記得兩年前鬍鬚曾心臟病發,緊急入院通波仔,仲被診斷三條血管都塞咗,事後有話佢植入咗三支金屬支架,照咁講,林公公尋日係咪暗示自己身體好心臟強,最少比鬍鬚曾好,所以先有得上位呢?

「Money18免費即秒股票報價網站」現推出8升級功能,財經資訊,實時實發!