關愛劏房戶 治標不治本

專幫港府補鑊嘅關愛基金，又有新搞作喇！今次受惠嘅係劏房住戶，本來都算係好事嘅，弊在劏房問題牽連甚廣，頭痛醫頭，腳痛醫腳，根本於事無補。

話說關愛基金建議向接獲政府清拆令嘅工廈或私樓劏房住戶發放一筆過搬遷津貼，金額由不足二千蚊至最多七千蚊，申請人有入息限制，預料會有四千人受惠喎。

幫劏房住戶渡過難關，係政府應有之義，問題係，關愛基金只不過係「政治萬金油」，最多止吓痕，緩和吓表面病徵，對頑症痼疾根本無效。治標不治本，反而可能因為延誤治療而搞到病入膏肓，咁咪仲大鑊。

其實有頭髮邊個想做瘌痢吖，劏房住戶多數係捉襟見肘嘅基層市民同新來港人士，入住公屋唔夠條件或者未輪到，租住私樓又貴。搬遷津貼只係一次過，而且金額有限，你話佢哋搬得去邊？除咗劏房搬劏房，根本冇其他選擇，叮！

講來講去，劏房之所以氾濫成災，成為香港之恥，完全係港府短視，房屋政策乏善可陳，對基層市民欠帳太多嘅惡果。

香港地少人多，土地資源有限，加上近年人口不斷增長，而當局土地供應又不斷縮水，導致今時今日樓價失控。樓價貴，租金自然水漲船高喇，而最離譜嘅係，有啲劏房及籠屋嘅呎租仲貴過山頂豪宅，問你服未。愈來愈多人冇瓦遮頭，難為煲呔曾仲話每對夫婦最好生三個喎，唔通叫人哋瞓街咩？叮！

講開生仔，真係要叮多一鑊！嗱，本港人口老化嚴重，制訂長遠人口政策宜早不宜遲，港府○二年發表人口政策文件，話每兩年做一次檢討，點知又係大隻講，檢討無影無蹤。

舉個簡單例子，家陣每年都有幾萬名內地人持單程證移居本港，但當局並冇一套針對性嘅措施幫助佢哋融入社區，結果咪搞到七國咁亂咯。仲有吖，近年內地孕婦來港分娩成為趨勢，除咗令醫院產科瀕臨爆煲，仲衍生出好多社會問題。好簡單，呢啲「港產內地嬰」以每年數萬人嘅速度遞增，日後一旦大量回流，隨時令本港住屋、福利、醫療、教育癱瘓，當局又點樣應付呢？

計太一叮話齋，夕陽政府進入倒數，高官個腦只剩低「等收工」三個字，仲邊有未雨綢繆呢支歌仔唱吖。煲呔曾講拜拜之前，除咗攞關愛基金呢盒萬金油出嚟虛應故事，敷衍市民，睇怕都冇第二招咯，叮！