政壇：李泳漢退選照顧患病母
原本會拍住人民力量報名參選區議會嘅李泳漢，因為媽咪施明上周喺屋企感到不適，兼且雙眼爆微絲血管；泳漢第一時間陪媽咪睇醫生，醫生指施明血壓高達二百，假若得唔到妥善照料，會有失明同中風嘅風險。由於事態嚴重，泳漢幾經掙扎決定退選，全力於非常時期照顧媽咪。
泳漢好無奈咁話：「雖然覺得對唔住戰友，但阿媽一世人得一個，參選嘅嘢今屆唔得咪下一屆咯。呢排細佬忙拍劇，我冇可能喺咁危險嘅時候揼低阿媽唔理。」問到施明現況，泳漢話血壓暫已受到控制，又話：「我主要睇住佢食嘢同幫佢量血壓，另外要幫佢處理一啲法律上嘅嘢，因為之前仲有官司未完，媽咪仲有好多嘢煩。」
李泳漢陪伴施明晚膳，確保媽咪唔會亂食對血壓有影響嘅嘢。