政壇:搞搞政:唐唐垃圾英文信串錯字

過往曾被批評英文書信來往中出錯嘅疑似特首候選人唐唐,喺前日請辭政務司司長,即時向高級公務員發出電郵作出話別,但有人喺網上睇完網上流傳疑似唐唐嘅話別電郵後,發現佢將「自從我○二年加入政府……」嘅英文,寫成為「Ever since I joint the Government in 2002……」唐唐之前發表「垃圾論」(completely rubbish)被批評文法錯誤後,依家似乎又老貓燒鬚犯上小學生嘅錯誤喎!

英文科老師陳明姬話唐唐寫嘅句子明顯用錯字,無論喺意思上定文法上,都應該用joined(加入)而唔係joint(連結),因為ever since之後,應該用過去式past tense,佢估計唐唐可能混淆咗,以為個個英文生字都可以加個「t」就變成過去式,亦有可能唐唐平時讀英文多過寫英文,一時手快就將兩個讀音好接近嘅字搞錯咗。

如果嚟份電郵係假嘅,被人屈嘅唐唐當然冇事,但倘若係真嘅,唐唐同唐營中人未正式出師就再次撞板,難保日後會再出現乜致命錯誤,睇怕有得震冇得瞓喇。

「Money18免費即秒股票報價網站」現推出8升級功能,財經資訊,實時實發!

(設計圖片及對白)