政壇：天才女新丁荃威區自動當選
首次參加區議會選舉嘅林婉濱喺荃灣荃威選區自動當選，作為新丁，佢冇諗過贏，更冇諗過可以自動當選。荃威選區一直係富貴黨楊福祺嘅選區，但佢去英國退休，所以索性退埋黨，留低個席位畀助理林婉濱。林婉濱話佢跟楊福祺退黨，唔係同富貴黨有乜嘢不和。但佢就自爆報名參選前，新民黨田北辰曾經搵過佢幫手，希望拉佢入新民黨，但最後林婉濱話費事搞到關係太複雜，所以婉拒咗田二少嘅好意。
林婉濱開口埋口都好謙，但我哋搵過資料，發現佢既係福建社團聯會同新界社團聯會成員，而且佢仲係國際知名的ＭＥＮＳＡ學會成員。入呢個學會要先測智商，過咗一定分數先可以入會，目標係聚集全球智商最高百分之二嘅人，股壇長毛David Webb都係會員，可想而知佢有幾勁。唔知係咪都計過呢個選區勝算高，先決定參選呢？
林婉濱話冇諗過會自動當選。