監管豈能靠好彩 空難一次也嫌多

六秒鐘會發生乜事？如果過馬路，綠燈可能未轉紅。但如果兩架飛機相距兩公里對頭飛六秒鐘，即刻機毀人亡係咁先。咁恐怖一幕，差啲喺兩間本港航空公司航班發生，諗起都一額汗。

話說日前國泰一架由紐約回港嘅客機，同另一架由高雄返港嘅港龍客機，等候空管人員指示降落赤鱲角機場期間，最接近時相距只有兩公里，僅僅係安全距離嘅兩成。好彩機上空中防撞系統發出警示，機師即刻各自調校飛行高度，一上一下「彈開」，否則兩機合共六百一十三名乘客同機組人員凶多吉少。

民航處前任處長林光宇話，兩機分隔不足極之罕見，相撞機會極大，今次冇發生意外非常好彩，如果係對頭飛，飛機六秒內就會相撞。佢建議民航處徹查事件，搞清楚係空管人員經驗不足，定係機師技術唔夠班，亦要檢討程序設計。另一位民航處前任處長樂鞏南更指，今次事件，最清楚空中交通情況嘅空管人員責無旁貸。

話時話，香港機場係全球最繁忙空港之一，起降頻繁，唔可能次次靠好彩逃過大難。查實，由於監管唔到位，本港航空業管理甩漏唔少，監管當局責無旁貸。呢，本報幾個月前曾經踢爆，民航處冇主動定期公布本地航空公司須強制性呈報嘅事故資料，由○九年一月至今年年中，當局公布嘅航空事故得廿六宗咁大把，相對於同期一千三百四十六宗事故呈報，比例僅約百分之二。

咁即係話，港人對航空公司服務質素如何、飛行安全係咪理想，根本無從判斷。航空公司亦大條道理唔向公眾交代改善情況，冚得就冚，咁做簡直係攞乘客安全較飛！

政府關人個關，航空公司咪得過且過囉。早排有本地航空公司空姐同機師懷疑喺機艙自拍慾照，當事人無視飛行安全，缺乏安全意識，問題固然嚴重，但航空公司管理不善，當局監管不力，同樣罪無可恕。

香港國際機場月前險勝北京機場，蟬聯世界機場冠軍；仲有吖，機管局正就興建第三條跑道吹到天花龍鳳，認真巴閉。弊在盛名之下，其實難副，大吉利是講句，空難一次都嫌多！

計太一叮話齋，按照管理學大師梅菲「凡可能出錯之事必定會出錯」嘅定律，如果當局唔消除隱患，堵塞漏洞，加強管理，可能發生嘅必然會發生，到時仲會唔會咁好彩呢？香港個朵臭晒事小，機毀人亡事大吖，叮！