政壇:鄭裕彤孫仔叫執平股
近期受到外圍市況嘅影響,個市一係就chok上chok落,一係就勁跌,有唔少散戶都見到個市跌成咁,都心思思想入市。尋日見到新世界發展主席鄭裕彤乖孫鄭志明,佢話依家係入市嘅時機,咁到底乜嘢板塊好呢?佢就話依家個市咁,乜嘢板塊都好,因為乜都平喎!
鄭志明依家係新創建執行董事,佢哋喺啱啱嗰個年度,策略投資表現理想,唔單止係分拆咗新礦資源上市,仲賣咗部分策略性投資包括光大國際同埋AIA友邦保險。
至於點解要出售呢兩隻股份,鄭志明話,其實公司主要根據隻股份嘅資產值,同埋買入價嚟決定投資策略,而佢又話新創建嘅策略投資主要係由旗下一個委員會決定,而投資嘅項目多數都會同新創建嘅業務有關。