政壇：搞搞政：黑手公文袋全城通緝

法庭裁決港珠澳大橋環評報告司法覆核一案，政府勝訴後，提出訴訟嘅朱綺華婆婆爆大鑊，話自己乜嘢都唔識，係有人叫佢先咁做，唔少人認為公文袋喺背後推波助瀾。

富貴黨今日會喺報章刊登聲明，話要「緝拿幕後黑手」，而副主席周梁淑怡尋日亦發炮，話依家種種迹象顯示，打官司咁大件事，朱婆婆背後有人教路，唔似係出自佢老人家意願咁簡單。周梁又話因為呢單官司，港珠澳大橋工程成本上升六十五億元，要由納稅人埋單，公文袋作為政治團體，唔可以一句「畀專業意見」就將責任推得一乾二淨。

不過，一波未平，一波又起，涉及全港三十萬外傭居港權案今日判決，今次幫外傭打官司嘅李志喜，又係公文袋黨員。如果單官司判外傭勝訴，會否好似港珠澳大橋案咁，令公文袋背負多一條「幕後黑手」罪名呢？到時真係水洗都唔清。

據聞該黨一班競逐連任嘅區議員就好緊張，每逢落區向街坊拉票時，都只係提政績，反而絕少將黨名掛喺嘴邊，似乎想劃清界線。