政壇：盧振雄呻歡送會玩殘自己

下月起退休前休假嘅消防處一哥盧振雄，近日佢嘅探訪餞別活動同周年晚會惹來前線人員不滿。佢尋日同傳媒茶敍時回應話，如果有人話佢玩殘消防員，實情係「玩殘我自己」；又話愈近退休就愈忙，事關佢用咗「七個朝早」探訪七個總區，目的只係想鼓勵同袍、分享感受同增強溝通，又話退休歡送會係紀律部隊嘅傳統，將歡迎會同周年晚會一齊搞，只係為免同事兩個月內搞兩次活動咁辛苦。

盧Sir入職將近三十七年，佢憶述八六年仲係消防隊長時，有一晚凌晨貨車翻側、跑車撞向貨車，佢去救援時見到後座中間有堆嘢，睇真啲原來係一具無頭女屍，隔咗兩、三個月，影像先至喺腦海中消失。

退休在即，佢會行山同做義工，十月底去張家界旅行，但就冇興趣投身商界嘞。至於接班人陳楚鑫，佢話任職處長期間見陳楚鑫仲多過見佢太太，所以唔擔心對方表現喎。另外，死因庭早前建議消防唔好豁免體能測試，盧Sir就懷疑係一個誤解，佢話殉職隊目楊俊傑需要嘅「可能係一個體檢」。