政壇：煲呔曾施政報告衰到尾

日前港大民調結果顯示，煲呔曾民望繼續下瀉，反對佢做特首嘅比率創新高，當中以80後受訪者佔七成以上。夕陽政府剩低約九個月任期，民望止跌惟有寄望十月發表嘅施政報告，但相信連佢都估唔到，佢係低處未見低。

尋日，中大亞太研究所今個月二十至二十二日用電話抽樣訪問咗八百多名市民，最多人（兩成九）認為施政報告應優先處理房屋規劃問題，其次係民生福利（兩成八）、經濟發展（一成三）、醫療衞生（一成一）、政制與管治同教育問題（同為百分之七），認為應優先處理環保政策嘅只有百分之三。

市民冇期望 泛民玩杯葛

對於各項社會民生議題，最多受訪者（三成三）認為應優先處理通脹問題，其次為貧富差距（兩成一）、復建居屋（一成八）、內地孕婦來港產子（一成三）同食品安全（百分之八），只有百分之三認為應優先處理舊樓安全問題。

雖然調查結果反映咗受訪者嘅關注，但最攞命嘅係逾五成受訪者坦言對施政報告冇期望，僅四成二表示有期望，百分之六抱很大期望。

問到點解對報告冇期望，四成七受訪者指出，主因係覺得現屆政府缺乏管治能力、兩成半認為本港的深層次矛盾無法短期內解決、一成二指現屆政府任期快將完結、百分之八歸咎反對力量阻撓政府施政。

咁多受訪者對施政報告冇期望，仲邊有人會理施政報告噏乜，亦即係對煲呔曾絕望兼透明喇！咁都不特止呀，立法會行政管理委員會尋日開會，泛民主派議員表明唔想咁快搬入添馬艦新立法會大樓，據聞有人諗住玩大佢，話煲呔曾十月十二號喺新大樓宣讀施政報告時，泛民議員可能玩杯葛缺席，一鑊翹起煲呔曾，等佢全程望住啲空櫈。死未?