旅客新高又如何 宰客之道蠱惑多

內地「十．一」黃金周來臨，香港旅遊業睇怕又有一番大作為。咁又係，香港背靠祖國，點會冇運行吖！嗱嗱嗱！又有喜訊公布喇：今年八月訪港旅客達四百零六萬人次，創有紀錄以來單月突破四百萬人次大關。香港旅遊事業果然誇啦啦！話時話，內地「十．一」黃金周長假期又展開，預計到港或過境旅客會有百分之八至一成嘅增長，商家梗係賺到笑，好似兒歌咁唱：香港旅遊業同內地同胞恍如魚兒離不開水，花兒離不開陽光咁！

之不過，香港旅遊業既然靠內地客支撐，咁旅遊發展局及旅遊業議會又有冇做好「好客之道」呢？大家如果唔係善忘嘅話，一定會記得導遊阿珍辱罵旅客強迫購物，導遊阿蓉與內地旅客大打出手，仲有去年內地前乒乓球國手懷疑被迫購物「激死」等等醜聞。叮！內地客來港旅遊，開心事變喪事，如果香港嘅「好客之道」係咁款，就該煨咯！

訪港旅客創新高，固然係好事，之不過，太一叮心裏有個謎，旅遊業議會話已向旅行社發出通告，提醒佢哋要確保「一團一導遊」、「不得中途棄團」，又有所謂「十招規管杜絕刀手導遊」。總之，通告條文堂而皇之，都係想內地同胞來到香港呢個「購物天堂」可以盡興，而唔係畀人遺棄街頭搞到吊吊揈！

旅遊業議會又有何方法確保有關條文得到落實而業界操守不會離罩？當局早前有所謂四個建議並推出諮詢，惟迄今又冇下文，哦！原來仲有兩大招，一招係撥款十萬元聘請保安顧問公司加強巡查旅遊景點，另一招就係學警方掃黃放蛇——破天荒聘人從內地報團來港觀察，主動出擊捉拿宰客旅行社及導遊。

其實，呢兩招就算有阻嚇作用，都難免掛一漏萬，黃金周每日閒閒地三、四百個團，唔通團團都放蛇？處處景點都有人巡查？同胞信不信？反正太一叮就不信。

再講道高一尺，魔高一丈，好似「一團一導遊」咁，有旅行社就出蠱惑將個團一開二，首兩日有導遊接團，餘下兩日由另一旅行社接待，如此走灰色地帶，旅議會又吹得佢脹咩？

講到尾，旅遊業議會往往出事後先至急急推出一招半式補鑊，又話有「記分制」對付違規旅行社及導遊。不過，佢唔記得自己係「冇牙老虎」，得個樣好打得有鬼用咩！黃金周如果冇內地同胞投訴，真係要劏雞還神咯！叮！