政壇：工總去信保中藥研究院

雖然政府口口聲聲話要發展中藥港，十年前成立賽馬會中藥研究院，十年後南柯夢醒，月前拋低一句「成效不彰」、「管理混亂」，就殺院了事。夕陽政府奉行鴕鳥政策，甚少同政府唱反調嘅工業總會，近日去信煲呔曾，對急急殺院表示不能理解，廠商會同九龍總商會都加入聲援行動。

工總喺信中話，政府想成立新委員會接棒搞中藥，但該會仲未開始成立，卻急於停止賽馬會中藥研究院，當中產生嘅真空期，可能減慢香港中藥業研發進度，會方重申，香港有實際需要維持一所研發實體。廠商會近日則草擬緊信件，痛陳利害，坦言唔少業界會員需要就測試藥物等問題，急切尋求中藥研究院協助。

賽馬會中藥研究院主席劉文煒炮轟政府口講扶植中藥，卻講一套做一套，對當局堅持殺院嘅決定，感到十分失望。對於政府話研究院「成效不彰」，佢話事實唔係咁，聲言有部分藥物仍在研究中，需要時間等待收成。佢又批評新成立嘅委員會係「外行人管內行人」，成效成疑。業界群起反對，佢仲話若政府堅持殺院，唔排除觸發業界上街抗議。