政壇：搞搞政：跆拳女將挑戰高達

為咗攞下屆立法會超級區議會選舉嘅入場券，多名「政星」都報名參選區議會，但大多畀人狙擊或挑戰，最新戲碼喺葵青荔華選區競逐連任嘅白鴿黨立法會議員「高達」李永達，將會遭到前跆拳道港隊成員阿Ling朱麗玲嘅挑戰，加上選民力量亦派出高舉「票債票償」口號嘅「慢必」陳志全狙擊高達，相信到時會有好戲上演。

有政黨尋日舉行全女將誓師大會，據聞阿Ling除咗係跆拳道高手之外，教育程度又達到碩士，簡直係文又得武又得，況且有當區居民亦對每逢四年一次選舉至蒲頭嘅高達好有意見，睇嚟會有一番惡鬥。

其他女參選人要突圍而出，就要花多少心思，喺演藝學院畢業、將出選梨木樹東嘅呂迪明，就自創個「民生、民心，迪明關心」嘅口號；而將出戰興芳嘅梁嘉銘，原來係嚟自「議員世家」，佢競逐連任區議員嘅爸爸同老公都有嚟撐場。已報名參選梨木樹東同興芳嘅，分別仲有陳琬琛同吳劍昇。