政壇：吳傑莊三年前低吸金條
時勢立立亂，依家揸住邊個國家嘅貨幣都死。金至尊數碼行政總裁Johnny吳傑莊自爆三年前當金價每安士九百美元時已買金條，近年金價拾級而上，最近雖然回番少少，但仍然相當和味。
除咗買金，搞IT生意都係佢強項，近日升呢做金至尊旗下「尊1網」嘅CEO，專為中港紅星、藝人打造產品平台，頭炮係為電影中嘅女演員設計閃亮「月影星光」系列。
佢話紅星着過嘅衫、戴過嘅飾物，都會火速爆紅，只要加以設計，絕對係一門好生意。為斟介更多紅星加盟合作，佢笑言被迫夜蒲：「我習慣夜晚十一點瞓，但大明星往往三更半夜先收工，惟有深夜出動嘞。」
