政壇:丁志威洗80後偏激形象
之前都講過,今屆區議會選舉出現咗唔少年輕新面孔,好似80後嘅陽光勵進會社長阿Roy丁志威以無黨派人士身份參選黃大仙竹園北選區,對戰社民連主席陶君行以及同為無政黨背景嘅陳嘉偉。
家族做塑膠生意嘅阿Roy話初初決定參選時,家人都有啲擔心,但佢自細受爺爺教誨,話年輕人要有所作為,覺得應該衝破家族嘅枷鎖出去為社會做啲事。好多人都話80後偏激,佢反而想以溫和嘅態度服務社會。
因為阿Roy姓丁,又好鍾意食出前一丁,街坊幫佢起咗個名叫「新丁」。佢話自己雖然唔係住喺本區,但由於爺爺間公司喺新蒲崗,所以自己經常都去黃大仙,頗了解本區嘅情況。佢同老友○六年傑青呂宇俊一齊創立咗陽光勵進會之後,決心服務社區呢團火就燒得更加猛烈。
丁志威好鍾意食出前一丁,所以街坊都叫佢「新丁」。