政壇：新立會公眾入口 陰暗似山窿

喺添馬艦嘅新立法會大樓啟用在即，記者前排遊覽過新大樓唔少地方，發現裏面確係好寬敞好堂皇好現代化，但公眾入口就細小同陰暗到不成比例，確係美中不足。

新大樓一共有四個入口，兩個位處添美道面向中信大廈，兩個對住維港，議員專用同公眾用各佔兩個。議員用嘅入口好宏偉，佢哋可以搭長電梯直上會議廳，陽光透過玻璃牆射向電梯，不知幾開揚。可惜公眾入口完全係另一回事，面向維港嘅公眾入口尤其差，喺正鼓形嘅會議廳下面，公眾穿過自動玻璃門進入後，只見到一大幅牆，牆下面有一個方形嘅入口，正如立法會行政管理委員會委員劉慧卿所言，成個山窿咁。總之呢個入口非常陰暗，似後門多過似正門。

烏蠅蚊蝨仍未絕迹

到咗依家，大樓都起好咗，想改都冇得改。經公眾入口離開大樓，就係啱啱對正新政府大樓所謂綠地氈斜坡嘅側面，呢度一啲都唔綠，恍如一堵灰色嘅護土牆。市民喺政府嘅心目中係乜，市民得到嘅對待就係最佳寫照。

大樓周圍都仲係趕緊工，周圍沙塵滾滾，議員已經分批搬入去，佢哋自不然有好多意見，例如會議廳枱面角位太尖、張枱太闊、張櫈只能前後移動而唔能夠向左或向右移、議員辦公室唔准鑽窿掛畫等，相信議員相繼入伙後，會有更多意見同不滿。

有老友八畀記者知，老鼠喺新大樓已經絕迹，但烏蠅、蚊同蝨都仲有，希望煲呔曾下月中喺度讀施政報告時，喺公眾席上聆聽嘅唔包括蛇蟲鼠蟻啦！