做八年僅加薪$700
【本報訊】「做咗八年都只係加得七百蚊人工,一年加一百都唔夠,返通宵又要追更,連續當更三十三小時先至有得休息,係咪唔合比率?」蒂森克虜伯罷工的員工訴說,更指在一○年工資增幅僅為百分之零點五,今年亦只有百分之三,增幅遠低於通脹。有員工批評,多年來工資「跑輸」通脹率,和減人工沒有分別。
蒂森克虜伯電梯公司為全球三大電梯製造商之一,去年銷售額達五十二億歐元。公司雖然賺取大筆盈利,但遭批評沒有與員工分享成果。
通宵更連續返33小時
二十六歲技工陳先生現時工資為七千一百元,工作八年只獲得加薪七百元,低薪且人手極不足,每名技工每日需要為四至五部升降機例行檢查,又需要應付緊急壞𨋢情況。
陳先生現時每個月返四晚通宵更,更須連續工作三十三小時才可以休息。陳先生形容,工時長及人手少令員工的心理壓力大增:「近排突發性工作多咗,要兼顧好多嘢,搞到做嘢都冇以前咁專注。」
有員工更透露,機電署有指引規定例如進入𨋢槽等工種,需要兩位技工同時工作,但人手長年不足,有時一個人硬着頭皮進入𨋢槽,曾試過被困逾兩小時才有人將他救出。「明知違反機電工程指引,但驚都冇計,有時會叫(大廈)保安睇多兩眼,如果見到好耐冇出返嚟就要幫手報警。」
陳先生工作八年只獲加薪七百元。