除淫務盡祭重典 勿施故技玩包庇

壹淫媒嘅免費報《爽報》明目張膽宣淫販賤，公然挑戰道德底線，引起全港市民抵制，團體連日來紛紛發起「伐爽行動」，誓將「下流毒物」剷光除淨。

嗱，呢啲就叫做眾怒難犯喇。截至周五，影視處已收到《爽報》含不雅、淫褻及暴力等內容嘅投訴一百二十八宗，該處見群情洶湧，主動將呢份鹹報送交淫審處評級。尋日終於有結果，其中一日嘅情色小說，同埋連續兩日嘅網上聲音版被暫定為第二類物品，講白啲即係不雅物品咁解。

叮，多行不義必自斃吖！《爽報》誨淫誨盜，荼毒青少年，被暫定為二級不雅，係咎由自取，自作自受，關鍵係，當局必須做到有法必依、執法必嚴、違法必究，咁先至有意義，否則又係嘥氣嘅啫。太一叮咁講唔係杞人憂天，事關港府最鍾意玩包庇嘅喇，今次會唔會重施故技，真係好難講o架。

根據《淫褻及不雅物品管制條例》，任何人發布不雅物品而被定罪，首次最高罰款四十萬元及監禁一年，如果再犯，最高罰款八十萬元及監禁一年。法例清清楚楚，罰則亦唔算輕，太一叮不厭其煩再重複，只係想講出一個事實，就係當局一向有法不依，對淫媒百擒百縱，刻意放生。呢，咁多年來，壹淫媒觸犯有關條例而被定罪嘅個案已有一百一十六宗，係如假包換嘅積犯慣犯，但從來冇人因此坐過一日監，罰款亦只係一萬幾千，根本無關痛癢。

正如城市大學專業進修學院學術統籌宋立功話齋，影視處對壹淫媒嘅罰則過輕，全無阻嚇作用，對方只將罰款視為經營成本。

當局唔只玩包庇，最離譜就係一法三制，三重標準。當年《東方日報》、《太陽報》刊登外國女星Kelly Brook性感照，已經按規定打咗格仔，依然被評為二級不雅；而爛果報同日刊登同一輯照片，竟然被評為一級非不雅；仲有呀，喺本港有售嘅外國雜誌《NOW》刊登同一輯冇遮冇掩嘅照片，居然連送檢都慳番。當局親疏有別，簡直將法例當兒戲。

講開又講，今次評級結果，淫審處例牌又係搵份銷量唔多嘅報章公布。咁就奇嘞，如果淫審處畀唔起廣告費，唔敢搵銷量最多嘅報紙，咁大可以喺政府新聞網公布o架，家陣鬼鬼祟祟，閃閃縮縮，好似唔見得光咁，算點先？

咪話太一叮唔提醒，港英餘孽對壹淫媒百擒百縱，港人早已忍無可忍，今次《爽報》宣淫激起公憤，如果當局繼續玩包庇，市民唔止去壹淫媒總部抗議，仲隨時踩上添馬艦「門常開」，搵你哋班餘孽算帳o架，叮！