CULTURE噏：寫得有Point就係食神

寫食評不再是名人食家專利，這次找來90後網上女食評人Alison，分享對這股熱潮的看法。

隨着網絡發展，愈來愈多90後喜歡四圍食，然後將食評上網，評論餐廳食物的優劣，分享美味。本港著名食評人，有「少年食神」美譽的林澄光認為，只要意見中肯又有Point，即使在網上發表食評，亦能成為真正食家。

Alison：

90後大學生，就讀香港大學法律及政治學系，於網上寫食評近三年，約有五百四十篇食評。

Michael林澄光：

著名飲食專欄作家、食評人，曾主持多個電台、電視台飲食節目，有「少年食神」美譽。

Alison：自小就好鍾意食嘢，周圍搵好嘢食，然後同屋企人、朋友分享。大概喺○八年，食評網站興起，我就寫埋一份，希望同更多人分享。剛開始時，只簡單寫幾句，再上載張用手提電話影嘅相片，後來愈寫愈仔細，又上載好多相片，多到連食評網都放唔晒，所以就索性開個Blog寫食評。

Michael：依家有好多畀人寫食評、分享美食嘅平台，除傳統報紙雜誌外，近年甚為流行嘅食評網站，不單方便更多人發表食評，仲提供很多食肆資訊，方便網友「搵食」。

Alison：寫食評後，我認識到一批志同道合嘅朋友。有網友到我推介嘅餐廳試食，然後又同我分享，大家仲做埋朋友添；最重要係知道自己寫嘅食評有人睇，甚至被用作參考，真係好有滿足感，好開心！

Michael：現實生活中，未必咁容易集合到一班鍾意食及鍾意搵嘢食嘅朋友，但係透過網絡世界，愛食之人就可以聚集，對美食暢所欲言。

Alison：我寫食評有個宗旨，就係憑良心，好食就寫好食，唔好食就寫唔好食，唔會受其他因素影響。曾經有一間新開張餐廳邀請我去試菜，我覺得佢有做得唔夠好嘅地方，會照直寫出嚟，唔會因為受到邀請，就有所避忌。

Michael：只要食評做到中肯、持平，無論透過任何平台同人分享，都可以成為一個食家。

Alison：如果有機會，我都想將興趣轉為事業，成為食家。但就算唔可以，只要仲有能力及時間，都會繼續周圍搵嘢食，同大家分享美食！