政壇：Eva暗寸警員冇慎行

警隊近排爆咗唔少醜聞，唔係洩露機密，就係警員罔顧紀律，將自己啲不雅照片放上網，搞到市民對警隊更加冇信心。尋日警察學院舉行畢業禮，同警隊冇乜關係嘅運輸及房屋局局長鄭汝樺（Eva）擔任結業會操檢閱官，佢借向新紮師兄師姐致詞嘅機會，引孔夫子嘅說話要佢哋小心一言一行，尤其係使用互聯網同智能手機嘅時候，暗寸警隊新人要嚴於律己。其實警隊高層之前已三令五申叫下屬自重，Eva以呢啲家長式教仔口脗教訓學警，效果又會好得去邊呀？

Eva喺結業會操上致詞表示，依家互聯網好發達，叫班學警小心一言一行，要覺得成日都有部Web Cam同手機影住自己。期間佢仲大拋書包，話二千幾年前萬世師表孔子已經話「君子慎其獨」，教班學警就算一個人嗰陣，都要維持好品格，咁先算係君子。Eva又睇穿依家唔少學警，其實純粹係受警隊嘅高薪厚祿而報考，提醒佢哋無論抱咩心態嚟做警察，出學堂後，就要有警察嘅抱負、目標同價值觀。