政壇：搞搞政：煲呔曾橡皮圖章亂咁印

中港政壇都有譏諷政壇應聲蟲係橡皮圖章嘅講法，管治無能嘅煲呔曾最近做咗名副其實嘅橡皮圖章。事關佢擔任名譽會長嘅旅港南海九江商會，最近因應創會百周年整咗份會慶特刊，竟然將煲呔曾個姓名印章亂咁加蓋喺兩個內地芝麻官員嘅簽名下，將煲呔曾呢枚橡皮圖章嘅功能發揮得淋漓盡致。

該商會最近印製咗大約一千本創會百周年會慶特刊，部分特刊已經派咗出街，特刊印有煲呔曾同前環境食物局局長任關佩英嘅題詞，可惜煲呔曾嘅姓名印章卻印咗喺佛山市南海區委常委冼富蘭及南海區外事僑務局局長林平武嘅題詞簽名下。唔少睇咗特刊嘅商會會員對印刷出錯都好唔滿意，批評特刊印製唔認真，將煲呔曾印章「張冠李戴」，既唔尊重相關人士，又可能招致招搖撞騙事件。查證下，據講係印刷廠出錯，但商會承認有責任，會回收已派出嘅特刊。

呢件烏龍事件雖然得啖笑，但律師黃國桐話，未經同意將他人印章蓋喺其他文件上，屬偽造文件，最高可被判監十年，政府同執法部門應該正視問題。特首辦就話，煲呔曾係接受邀請幫商會題辭同蓋印章，商會已經就印鑑誤植一事向特首辦道歉，特首辦會向商會跟進。