政壇：葉劉叫錯湯恩佳姓孔
香港孔教學院尋日搞咗個慶典，慶祝萬世師表孔子誕辰呢個大日子，仲請咗疑似特首候選人行政會議召集人梁振英同新民黨主席葉劉淑儀嚟做嘉賓。
唔知係咪近期特首選戰搞到大家好緊張，加上現場嘅中式布置，葉劉致辭時竟然叫錯咗孔教學院院長湯恩佳做「孔院長」，台下大笑時，葉劉卻轉數夠快，即刻以湯恩佳為孔子再生兜番，成功執生。
葉劉話，佢同湯恩佳相識多年，對於湯院長推動孔教儒學不遺餘力十分敬佩，故此喺佢心目中，湯院長猶如孔子再生，所以一時之間搞錯稱呼喎。
跟住，讀番書嘅葉劉又之乎者也上身，佢話大學之道所倡：「在明明德，在親民」，就係新民黨嘅名稱由來，故此同孔教學院嘅理念相近云云，難怪佢當咗湯恩佳係孔子再生。
