政壇：責狙擊幫咗田二少 毓民大舊圍砌長毛

新一屆區議會選舉嘅當選人擁有出年立法會選舉超級議員嘅入場券，因此吸引好多政壇老手落場。新民黨副主席田北辰最近都決定落場跑，社民連嘅「長毛」梁國雄仲急急將佢定為狙擊目標。不過，長毛嘅決定就引嚟人民力量黃毓民同「大舊」陳偉業嘅不滿，尋日兩人唱雙簧，大彈長毛此舉只會幫咗田二少，亦打亂人民力量嘅部署，長毛即刻反唇相譏毓民、大舊打口水戰冇意思。又係嘅，人民力量同社民連都分咗手啦，毓民、大舊憑乜嘢圍砌長毛呢﹖

添馬艦新政府總部爛溶溶入伙，立法會都開始陸續搬入添馬艦新立會大樓，毓民同大舊上個禮拜已經遷入新議辦執嘢，尋日更去到呢個對正解放軍總部嘅議辦舉行入伙儀式。早前我哋都同大家講過，建制同泛民兩派議員都怕咗佢哋同長毛，結果佢哋三個議會反斗星被發配到新大樓十樓嘅角落。不過，毓民同大舊卻冇乜同是天涯淪落人嘅感慨，尋日入伙儀式上就大鬧長毛喺嚟緊區選嘅策略。

口水戰後忽然轉軚

首先發難嘅係大舊，當大家講到長毛準備狙擊田二少時，大舊立即收起笑容，勁鬧長毛咁做只會幫咗田二少，仲打亂人民力量部署。佢認為長毛只會搶到同區參選嘅白鴿仔票，絲毫傷唔到田二少，而且人民力量都搵緊人狙擊田二少。毓民跟住亦冇好氣咁加入，唔明白點解長毛有言在先，都唔去狙擊公文袋嘅「大話湯」湯家驊。

長毛一聽佢哋嘅批評就反擊，話佢狙擊嘅係反對五區公投、贊成政改方案嘅人，田二少就符合晒兩個條件，兼且係一個有錢人，啱晒長毛口味，跟住仲反駁毓民同大舊，到尋日為止白鴿黨都未有人落場狙擊田二少。記得人民力量狙擊白鴿黨嘅時候，都畀白鴿黨指摘為「民建聯B隊」啦，依家只係角色掉轉啫！

好笑嘅係，長毛呢頭畀人批完、打完口水戰後，夜晚竟然忽然轉軚，透過facebook宣布放棄狙擊田二少，改為去中西區觀龍樓選區狙擊建仔嘅葉國謙，今日仲會落區爭取居民提名添，都唔知佢係聽人意見定選情峰迴路轉！