東方太陽顯威力 曬乾蘋果何足奇

風水佬呃你十年八年，淫賤黎出免費報《爽報》自己打自己，害人終害己，即刻現眼報，名副其實「爽死」！

正所謂，三歲定八十，三日定輸贏。《爽報》推出三日，結果如何呢？免費報發行量隨口噏嘅啫，淫賤黎話幾多就幾多，根本冇意義，大家有眼見嘅事實係，呢幾日爛果報跌紙跌到趴街，印數固然少咗一大橛，扣埋廢紙及賣剩回紙咯喎，保守估計每日實銷數量最少唔見咗五萬份，問你死未。喂，咁跌法，唔係好襟跌嘅咋！

正所謂，風景這邊獨好。爛果報慢慢陰乾，反觀另一邊就東方紅太陽升，《東方日報》每日銷量升咗約三萬五千份，《太陽報》仲勁，每日足足賣多咗四萬份。事實證明，讀者眼睛係雪亮嘅，太一叮喺度講聲，多謝晒！

其實，《爽報》自稱每日發行八十萬份，究竟有幾多直接運去回收呢？又有幾多送去堆填區呢？正如有人質疑，壹淫媒嘅印刷廠印完爛果報，仲要印另一份免費報《AM730》，最後先至印《爽報》，快極都要印到天光喇。試諗吓，等到呢啲免費報運到市區派發，已經過晒返工返學嘅繁忙時間，搵鬼睇咩？唔怪得日日都有大堆《爽報》原封不動運去回收喇。唉，淫賤黎鍾意燒錢冇人阻佢，最慘係浪費紙張破壞環保，簡直係大自然嘅浩劫！

話時話，淫賤黎搬石頭砸自己腳，可能佢有鋪咁嘅癮，認為咁先至夠爽啩。不過咁，爽還爽，佢出免費報宣淫販賤，荼毒社會，教壞細路，就唔能夠由得佢喇。嗱，《爽報》面世短短三日，影視處已收到近百宗關於內容不雅嘅投訴，家長團體群起抗議該報肆意渲染色情、禍害下一代，而教育評議會更致函全港中小學呼籲學校把關防止《爽報》流入校園。仲有吖，立法會議員梁美芬去信立法會教育事務委員會主席李慧琼，要求舉行緊急特別會議討論《爽報》渲染色情嘅問題。叮，呢啲咪叫做過街老鼠，人人喊打囉！

梁美芬就做得啱嘞，淫賤黎宣淫販賤，神憎鬼厭，立法會議員既然自稱係民意代表，理應出嚟主持公道，伸張正義。想當年，爛果報籌備出版時，為咗造勢，竟誣稱受到五大報圍攻，人稱「瞓街卿」嘅劉慧卿不分是非黑白，公然為爛果報護航，喺當時嘅立法局舉行所謂聆訊，同淫賤黎做咗場一唱一和嘅大龍鳳。今時今日，淫賤黎搞免費報賣弄色情，禍害青少年，點解又唔見瞓街卿出聲呢？佢嘅正義去咗邊？佢嘅道德又去咗邊？講到尾，香港地餘孽當道，漢奸猖狂，政棍淫棍狼狽為奸，互相包庇，有乜法子唔烏煙瘴氣吖，叮！