SUN世代：建築學成揸鑊鏟 住家Feel留客

民以食為天，不少人提起食都會滔滔不絕。生於飲食世家的劉晉，自小跟爸爸行街巿、嘗佳餚，與食結下不解緣。因為喜歡食，他毅然放下建築師名銜，跳入熱辣辣的廚房，協助爸爸開設「留家廚房」。貴為老闆，劉晉仍親力親為，目的只是想「留」給食客在家中歎「住家飯」的感覺。

劉晉在飲食世家長大，爸爸劉健威是私房菜始祖「黃色門廚房」主理人，自細他便跟爸爸四出覓食，飲飲食食更成為劉晉童年生活的主要活動：「爸爸好重視食，好多家庭聚會都同食有關，我仲成日跟爸爸行街巿！」同齡同學仔最愛打機，但劉晉卻愛上「揸鑊鏟」，七歲開始入廚，第一餐是煎腸仔及雞蛋做早餐。

劉晉○一年遠赴澳洲修讀園林建築，但除了做暑期工外，實際上沒有任何建築經驗，反而培養對煮食的興趣：「我喺澳洲最鍾意行街巿，熟晒全墨爾本啲街巿，由嗰時開始，我培養出對飲食嘅興趣！有時覺得去街巿買魚買菜，比畫圖則有更大滿足感！」他曾一手一腳煮七道小菜，招呼同學，連外國同學也激讚好味。

煮好菜似談戀愛

○四年，劉晉學成回港，未投身建築界，反而走入廚房：「我對飲食有興趣，咁啱爸爸要開『留家廚房』，所以決定幫爸爸手。」因不太認識如何打理一間食肆，劉晉坦言很有難度：「飲食業係一個好複雜嘅行業，要兼顧好多嘢，有烹飪、管理同服務，不過我有信心搞得掂！」

劉晉事事親力親為，貴為老闆，仍堅持親自去行街巿買餸，又會下廚為客人炮製特色餸菜及設計餐單：「要煮個好菜，首先要同食物有感覺，就好似同啲餸談戀愛咁！而行街巿係一個好好嘅機會，所以每星期會去三至四次！」他希望食店能帶給食客「留」在家中歎「住家菜」的感覺，所以堅守宗旨，以優質食材煮食，絕不加添加劑及味精，務求原汁原味，煮到有「家」的風味。

飲食業百花齊放，競爭大，但劉晉不擔心比較：「如果食品做得有特色，服務又好，點會無客人！」他還不時與同業交流，參考其他食肆的菜式。去年，「留家廚房」獲得米芝蓮一星食肆的榮譽，但劉晉未有驕傲：「有一粒星當然有壓力！不過我會繼續做到最好，只要有人欣賞就好開心！」

除了打理餐廳外，劉晉還到大型超級巿場教授烹飪班，又到電視台主持飲食節目，及在報章上寫文章分享飲食心得。

劉晉說：「食唔係必然，我希望用呢啲方式去改變人嘅飲食態度，重新帶起人對飲食嘅重視。」

劉晉小檔案

婚姻狀況：已婚、育有一子

興　　趣：游泳、潛水、旅遊、覓食

學　　歷：澳洲墨爾本大學園林建築系學士