政壇：庭上偷拍哪吒白鴿斷正
如果有少少常識，都知道法庭內外係唔可以影相同錄影，話說尋日勞資審裁處有單案件，有意喺參選區議會嘅「哪吒」方國珊有份上庭作供，點知佢對手白鴿黨張志董，同新民主同盟范國威都有旁聽，期間張志董想拍攝現場情況，點知當場斷正，被法庭書記捉住，好彩法官睇過佢錄低嗰段片後覺得冇乜特別，先至放佢一馬。
被人偷拍嘅哪吒話，估唔到張志董等人想借呢單官司挖佢嘅黑材料，而且仲要喺法官面前偷錄，仲話法官當場嚴厲譴責。不過，張志董就有另一版本，話一去到庭已見到哪吒影緊佢，只係未開庭先冇人知啫，反指哪吒係賊喊捉賊。張志董話唔係想影任何人，只係攞部電話出嚟時，唔小心開咗個錄影功能，後來法官都有話佢不知者不罪，所以冇懲罰佢。最後佢哋仲各自報警處理，搞到上差館先至收到科。