政壇：搞搞政：方文雄考慮接IQ博士棒
近日盛傳身兼中華總商會副主席嘅協成行董事總經理David方文雄，有望明年接替「IQ博士」黃宜弘做中總嘅立法會代表。我哋尋日遇到佢，佢對接棒一事不置可否，但承認中總有人游說佢參選。咁係咪會選？佢話要考慮有冇時間、點樣處理家族生意，事關功能界別議員要加倍努力喎！
其實，前日喺酒會問過中總會長蔡冠深有冇心儀嘅立法會人選，但佢冇直接表態支持邊個，淨係強調中總人才濟濟，好多成員都具備參選嘅條件，到時一定會有人出選喎，答得夠晒穩陣。如果David真係有心參選，睇嚟都要早啲做工夫爭取大家支持。
蔡會長又透露，過兩日會帶隊去山西考察幾日，了解下西部大開發嘅發展情況，同時探索下投資落戶嘅可行性，為香港同山西兩地嘅經濟發展開發新機遇添！
