政壇：澳博冠名贊助F3賽車

第五十八屆澳門格蘭披治大賽將於十一月十七至二十日舉行，今年澳門博彩股份有限公司（澳博）除咗係大賽中唯一嘅特約贊助商之外，仲冠名贊助其中兩項國際級賽事添。

澳門格蘭披治大賽係澳門本土發展嘅世界知名體育活動，被譽為亞洲最富歷史嘅賽車盛事。澳博今次冠名贊助嘅兩項賽事，分別係澳門格蘭披治三級方程式大賽同FIA世界房車錦標賽——澳門東望洋大賽。前者今年榮膺國際汽聯三級方程式洲際盃，仲係新創立嘅國際汽聯三級方程式國際盃壓軸大戰，而後者則獲得澳博連續第十年冠名贊助，呢項賽事喺二○○五年被列入為FIA世界房車錦標賽嘅壓軸決戰場地，深受矚目。

澳博係澳門唯一土生土長嘅賭牌公司，澳博行政總裁蘇樹輝話，澳博贊助賽車活動已經超過半個世紀，好榮幸成為賽事最大贊助商，希望藉住呢項世界盛事提高澳門嘅國際形象。