新聞自由跌得勁 繁榮基石蒙黑影

香港成日被人話「有自由、冇民主」，睇怕呢句話好快都要改寫咯，事關香港「自由之都」呢塊招牌已經隨時保唔住。

嗱，無巧不成話，尋日咁啱有兩單新聞都係關於香港自由度嘅。加拿大菲沙研究所公布全球經濟自由報告，香港再度蟬聯榜首，力壓老對手新加坡。但另一方面，港大最新民調顯示，市民對新聞自由嘅滿意度評分大插水，比五個月前急跌十個百分點，降至五成八，不滿意率就激增七個百分點，谷到上兩成，都咪話唔慄。

經濟自由攞第一，新聞自由大插水，你話係咪諷刺吖？外國評級機構覺得香港洋溢自由空氣，而香港人嘅切身感受就完全係兩回事，咁又反映咗啲乜？好簡單，就係反映香港「自由之都」呢塊招牌雖然外表仲係金光閃閃，但實際內裏已經開始銹蝕腐化、千瘡百孔！

港人點解對新聞自由嘅滿意度大跌，民調機構冇解釋。不過，都唔使問阿桂啦，罪魁禍首梗係專同傳媒過唔去嘅港府啦。早排警權風波鬧到滿城風雨，警方打壓傳媒採訪自由受盡千夫所指。「一哥」曾偉雄一句「黑影論」，更加令新聞自由蒙上陰影，搞到警媒關係「卡住咗」，港人憤怒係意料中事，不滿情緒反映喺民調，就更加唔出奇。

話時話，冰封三尺，非一日之寒，香港新聞自由被蠶食，都唔係一朝一夕嘅事咯。過去幾年，警方千方百計阻撓傳媒採訪，好似警方浪費公帑更改通訊系統咁吖，目的就係想拖延傳媒獲知突發新聞訊息。咁做唔止妨礙採訪自由，仲剝奪咗市民嘅知情權添，新聞自由度有乜可能唔嘭嘭聲咁大跌吖？

即係咁，人權自由向來係港人引以為傲嘅核心價值，更加係香港繁榮安定嘅成功要素。如果港府只識標榜經濟自由而忽略新聞自由等其他元素，咁就好似一個人嘅四肢只得雙手發育而雙腳萎縮，最後只會變成怪胎咋！

總言之，新聞自由跌得勁，繁榮基石蒙黑影。港府醒醒定定，千祈咪自毀長城呀，叮！