SUN世代：座右銘：戒囂張 勤工作

在Edmond成長的過程中，父親也不停向他傳達自己的人生觀，第一項是不可囂張，要互相尊重。「有啲有錢人經常白鴿眼，睇唔起人。爹哋會話，你有錢，又唔係派畀佢，點解要對佢咁差？」第二項，是要勤力工作。「佢話所有嘢都係做出嚟。做人嘅重點，亦在於『做』字。」做廠更加不可以偷懶，每天都要工作十多小時。怪不得Edmond說，造紙是適合男性的行業。

鍾意馬 鍾意贏

父親是馬主，十歲就接觸馬匹的Edmond對養馬懷有濃厚興趣。「一半係鍾意馬，一半係鍾意贏嘅感覺。」浸淫日久，他逐漸明白養馬只能當作興趣，不能有太大期望。「因為買馬除咗考眼光之外，仲要講運氣！」

Edmond第一次參與揀馬，就用了一百二十萬元購入「包裝大師」。這匹馬其後贏得幾次頭馬，回報率極高。不過，他說有朋友養很多馬，一年用四、五千萬元買馬，但只能賺回一千萬元左右，投資與回報不成正比。他說：「所以我好慶幸自己三十歲就明白呢個道理。」