政壇：搞搞政：統計處長退休屈下屬送禮？

官場有送禮文化，睇吓近期政府兩部門阿頭退休，下屬大搞宴會歡送、「禮物輕面子重」嘅文化就知一二，最新一單係統計處處長馮興宏，據聞為咗歡送呢位統計一哥，統計處有內部文件巨細無遺列明，建議各現職同事集資畀馮興宏榮休禮物嘅金額。下屬變相被屈破財送禮，搞到有人頂住道氣向傳媒訴苦，馮興宏知唔知呢次撲禮風波累死幾多人﹖

喺政府做咗三十七年嘅馮興宏本月二十四日退休，二十二日有個歡送晚會。尋日我哋收到署名「一群憤怒鳥」嘅投訴信，該封題為「處長走了，同事破財了」嘅投訴信矛頭直指統計處內各部門嘅主管要求同事參加歡送馮興宏嘅晚會，期間各助理處長曾發出電郵，跟住層層下壓逼同事，最少有三、四百人被拉或被迫參加，費事唔埋堆會畀人報復。佢哋最氣憤嘅係部門秘書公然出電郵通告，指定各職級嘅捐獻金額，粗略估計共有幾萬元，佢哋仲話，計過馮興宏或有兩千萬退休金，送禮嘅區區小數目，真係唔志在，不如捐錢行善，大家先可能順氣番少少。