免費報自慰自爽 淫賤黎害人害己

毛伯伯講過，搗亂，失敗，再搗亂，再失敗，直至滅亡。呢番說話用嚟形容淫賤黎，簡直係度身訂造，夾都冇咁啱。

呢，人哋出免費報，淫賤黎亦唔執輸出埋一份，而且仲要自慰自爽，自吹自擂，聲稱目標發行量係一百萬份喎。其實，既然係免費贈送，佢點吹都得喇，橫掂都係吹水唔抹嘴，不如講夠二百萬甚至一千萬份，咁仲爽吖，笨！

講起免費報，真係得啖笑，香港彈丸之地，家陣已有六份咁多，而且據悉有財團及報業集團準備推出兩至三份免費報迎戰添，直頭係七國咁亂。大家咪以為呢個世界真係有免費午餐，免費報派通街，得益嘅唔係讀者，亦唔係廣告商，而係廢紙回收商咋。今時今日廢紙有價，唔少免費報每日派發後迅速落入「回收兵團」手中，當廢紙變賣，更得人驚嘅係有啲免費報派都未派，就畀人一疊疊運去回收公司，尋日就有大堆《爽報》原封不動，等待回收，你話係咪浪費紙張破壞環保吖？而最搞笑嘅係，淫賤黎仲要自己打自己，出免費報打番爛果報，簡直匪夷所思。

正如全國政協委員劉夢熊話齋，壹淫媒喺收費報做唔到第一，惟有轉戰免費報，可惜市場已飽和，《爽報》印幾多最終都只會被丟入垃圾桶，徒勞無功。仲有吖，《東方日報》及《太陽報》回饋讀者減價，爛果報腹背受敵，減又死唔減又死。

劉夢熊就講得啱嘞，淫賤黎企圖以本傷人，到頭來害人終害己嘅咋。正如佢當年推出爛果報時帶頭減價，掀起報業惡性競爭，製造混亂，搞到成個傳媒生態烏煙瘴氣。

不過咁，今時唔同往日，以前淫賤黎搞蘋果速銷，短短十五個月燒錢十幾億，最後被迫關門，名副其實速速消失。依家淫賤黎嘅處境更加不堪，有人計過，佢目前最少有四條「血管」出緊血，一係台灣電視，二係互聯網業務，三係台灣《爽報》，四係香港《爽報》，加上如果爛果報為抗跌紙而減價，到時五條血管齊齊出血，睇佢頂得幾耐。再講，如果爛果報唔減價，隨時跌穿二十萬份，連第二位都保唔住。

唔講唔知，淨係搞台灣電視，估計淫賤黎一年就要蝕九億元。至於免費報咯喎，以每份成本大約兩元計，淫賤黎聲稱目標係每日印一百萬份，即係話每日成本就要二百萬，扣除收益，每年發行二百五十日，一年最少燒錢三點五億。咁樣燒法，淫賤黎識得印銀紙都唔掂喇，叮！

俗語話十商九奸，做生意損人利己唔出奇，奇就奇在淫賤黎出免費報竟然係損人不利己，諗起都好笑。難為佢仲鬧北大人Short Short地，原來Short嗰個係佢自己至真。唉，國之將亡，必有妖孽，人同妖嘅最大分別係，人係人那媽所生，妖係妖那媽所生，香港地烏煙瘴氣，皆因妖那媽特別多！