政壇：聘CEO風波肥胡攬上身

早喺個多月前已經講過，香港總商會被指違反正常程序，逼走前任總裁方志偉，再委聘前高官Shirley袁莎妮出任新總裁。由於Shirley係疑似特首候選人政務司司長唐唐嘅愛將，而總商會主席胡定旭又盛傳將會出任唐唐嘅競選辦主任，尋日就有報章喺頭版翻炒呢段舊聞。總商會特別發稿澄清，肥胡亦聲稱成件事最衰都係因為自己孤寒。

肥胡喺月前已經向我哋澄清過，強調委聘Shirley係由總商會主席委員會一致推薦並經理事會贊成通過，又話總商會根本冇委聘總裁嘅既定程序，因此亦唔存在違反程序嘅問題。尋日佢進一步解釋，話可能由於自己孤寒，先至冇喺報章刊登招聘廣告同正式委聘獵頭公司處理招聘新總裁事宜，事後諗番有可以改進嘅地方。

肥胡又強調Shirley並非由唐唐推薦，佢亦冇正式徵詢過對方意見，但唔排除喺非正式場合同唐唐閒談過Shirley嘅工作能力喎！