政壇：白富鴻空降半山撼白鴿
燕之家創辦人、菁英會前主席Frank白富鴻啱啱卸任菁英會主席一職後，決心出戰中西區衞城選區，對撼白鴿黨嘅鄭麗琼。Frank尋日下晝去遞交提名表，一班團隊同菁英會主席洪為民等眾兄弟挺身力撐，令佢非常感動。
原來Frank兩年前已經開始喺區內做各類社區工作，幾個月前仲成立咗中西區半山社區事務促進會，為參選區議員鋪路。佢話希望自己將來唔只可以為中西區服務，仲將佢喺商界多年累積番嚟嘅宏觀概念帶到整個香港社會。
講番對手鄭麗琼，本身任職註冊社工，已經喺該區做咗十七年區議員，Frank要贏，都要好努力至得。
菁英會成員齊現身支持白富鴻（右三）參選，包括王嘉恩（右一）、曾鳳珠（右二）、洪為民（左三）等。