政壇：鄉紳踩場逼唐唐踐諾

行政會議今日喺添馬艦新特首辦復會肯定好戲連場，事關兩位賴死未辭職嘅疑似特首候選人唐唐同埋CY梁振英將會同場現身，兩個快要走嘅人，仲邊度會有心機開會？話唔定枱面噴口水花，枱底就開片。與此同時，兩個請願團體舉定手到新特首辦踩場，其中一個仲係衝住唐唐而嚟，正所謂來者不善，佢今日冇運行啦！

早前盛傳唐唐尋日辭職，但尋日乜都冇發生，只係佢下晝三點幾去咗新特首辦，逗留咗大約一個鐘。CY就連續第二日話，就辭職事要同煲呔曾商量。唐唐係咪辭職，今日佢去到新特首辦肯定被人追問。

負責事項無一不辣慶市民

至於新特首辦外嘅示威亦唔比行會失色。梅窩鄉事委員會今日向唐唐追債，要求佢落實大嶼山發展概念計劃。

提一提大家，○四年唐唐做財爺時，擔任過大嶼山發展專責小組主席，結果做完諮詢後影都無埋。近年唐英年負責嘅扶貧、西九以至關愛基金，無一不辣慶市民，估唔到佢嘅蘇州屎遠至佢做財爺嗰陣，若然佢去選特首，市民真係要自求多福。

關注長者權益大聯盟今日亦會去請願，不滿牙科診所不足。兩個團體一齊逼埋喺二十四平方米「劏房」面積嘅示威區，加上示威區後面就係一個水池，萬一大家逼逼吓逼咗落水，真係唔知好嬲定好笑。

話時話，原來近日立法會新大樓有老鼠出沒，仲斗膽偷食秘書處職員嘅麵包，咁就證明咗添馬艦真係一個鼠輩橫行嘅地方，市民要小心咯。

講開選特首，前港區全國人大代表吳康民話，如果建制派喺選委會階段可以攞到一千個議席，咁建制派有兩人參選，都無問題喎。意思即係話，泛民主派要參選，都冇咁容易漁人得利囉。