盛品儒騎呢鞠躬議員O嘴

【本報訊】被指有可能向梁家榮施壓的三名亞洲電視要員，包括主要投資者王征、高級副總裁鄺凱迎及執行董事盛品儒，僅得盛一人與另一高級副總裁欒振國現身昨日的會議。

年紀輕輕、西裝筆挺的盛全程表現驚青，回應議員質詢時不時要身旁兩名律師「遞紙仔」，發言完畢後更突然站起身作九十度鞠躬，就誤報前國家主席江澤民死訊向公眾及江致歉，「騎呢」表現令一眾議員O晒嘴。

盛品儒昨獲安排在官員致詞完畢後首個發言，當他講了幾句：「不如我講吓亞視近年發展，我哋近年已經少咗好多外購節目……」已即被委員會主席黃毓民打斷，指今次會議非討論有關問題，着他返回正題。

盛品儒與欒振國均來自內地，後者選擇用母語普通話發言，盛堅持用不太靈光的廣東話，因而鬧出笑話，如多次將議員張文光的姓氏讀成蔣，及後張忍不住要更正：「我姓張，唔係姓蔣。」期間他多次與兩名律師「咬耳仔」，亦引起議員不滿，其中劉江華質疑：「你到底係聽我講，定聽緊律師講？」