地質公園獲認同 古老石山要變通

考吓大家，古老石山管理古老石山，結果會點樣？大家一時間可能唔明太一叮講乜，咁啦，不如聽一則好消息先。

繼「桃姐」葉德嫻威尼斯影展封后，香港又有好嘢登上國際殿堂喇！擁有豐富獨特岩石地貌嘅香港地質公園，正式獲聯合國嘅世界地質公園網絡接納為新成員，並改名「中國香港世界地質公園」，地質瑰寶地位從此得到國際認同。

香港被人話係石屎森林，原來石頭都係寶嚟o架！翻查資料，地質公園裏面嘅萬宜水庫東壩，就蘊藏咗世界上最大嘅六角岩柱群，氣魄恢宏，而且誕生於遠古，見證滄桑。港府咪話要發展綠色旅遊嘅，點解咁大塊生招牌都唔識利用？

無錯，香港人傑地靈，的確擁有唔少珍貴綠色資源，問題係港府捉到鹿唔識脫角啫！正如香港電影業縱有威尼斯影后，但喺港府帶領下，一樣搞到發展停滯不前，東方荷里活光芒暗淡。本地就算坐擁最正嘅天然勝景，落喺港產官僚手中，都變晒廢木爛石頭，暴殄天物。

好似地質公園咁吖，無數古老石山同特殊地貌就係一座座足以引人入勝嘅旅遊勝景，但係點解好多都名不見經傳、埋首亂石叢中寂無聲？點解北愛爾蘭嘅巨人堤道六角形岩柱，可以成為著名世界遺產旅遊名勝，而香港嘅六角岩柱群就喺國際上寂寂無聞，連香港都冇乜人識？

答案顯而易見，因為港產官僚同樣係一座座又笨又懶嘅古老石山，做嘢死枯枯唔識變通，更加係唔踢唔識郁，奇珍異寶落到佢手上都遲早變禾稈草。

嗱，如果唔係，位處地質公園範圍內嘅馬屎洲，就唔會失驚無神矗立一座比當地沉積岩層更加堅固嘅宏偉骨灰龕場。最搞笑係港府竟然以私人土地為由，冇一個部門出手阻止，結果咪變成最怪雞嘅生態熱點囉。

又如果唔係，「香港十大勝景」之首嘅西貢大浪西灣，就唔會差啲變咗富豪私人俱樂部，而官僚部門竟然束手無策，最後要靠網民力量先至得以守住呢塊生態寶地。大家話班官係咪地球上最食古不化嘅古老石山吖！

好嘞，答案開古，古老石山管理古老石山，結果就係暴殄天物，大量旅遊資源被浪費！港府快快諗吓點樣保護同宣傳推廣地質公園，唔好將寶物變爛石頭嘞，唔該，叮！