政壇：禁毒專員靜雞雞換人
早前公布新一輪高層官員調動，政府無論任命張雲正做海關關長以至鄧忍光做廣播處處長，都惹嚟外界唔少微言，但原來另一邊廂，之前做禁毒專員處理全城關注嘅校園驗毒計劃，同埋正生搬遷梅窩等燙手山芋嘅Sally黃碧兒，已經喺同一時間靜悄悄地調咗去香港駐東京經濟貿易首席代表。
雖然駐東京都好似幾好，但之前日本發生九級大地震加上核輻射，據聞有駐東京經貿辦嘅貿易代表落荒而逃，自己買機票返香港，搞到商務及經濟發展局要派另一個人接替，影響晒港府人員喺嗰次事件嘅英勇形象，而日本近年唔係地震就係海嘯，睇嚟Sally都要諗定辦法為自己同下屬定驚，防止同類事件發生，費事又畀人話就唔好啦。而接替黃碧兒做禁毒專員嘅許林燕明，之前係勞工處副處長，主力做職業安全及健康。