政壇：搞搞政：容永祺挺唐蹚渾水

專業及資深行政人員協會創會會長Samuel容永祺，自從自爆因為受到神嘅感召，所以會撐政務司司長唐唐選特首後惹起軒然大波，引起唔少基督徒不滿，呢股怒潮仲衝向佢。

死撐無擺上帝上枱

Samuel尋日返教會，有大約十個基督徒帶埋一張鑲咗佢肖像嘅油畫去踩場，話象徵佢受到神嘅感召支持唐唐只係佢活喺中央嘅框架入面。班基督徒仲舉住「容永祺、顯耶能！唐英年、洗乜諗！」嘅標語要求同Samuel合照。因為隔籬仲有唔少教友，搞到Samuel尷尷尬尬，惟有同佢哋去第二度傾。

Samuel同班踩場嘅基督徒講，兩個疑似候選人都係可接受嘅人選。但因為始終要揀一個，自己祈禱咗好多個月後感到好平安，所以選擇挺唐。真係學佢話齋，冇信仰嘅人真係唔係好明佢噏乜嘢。

班基督徒聽完，隨即寸佢，話金融風暴佢受到神嘅感召放晒啲股票時，點解唔叫埋啲市民齊齊散貨，又問佢之前支持西九新動力嘅梁美芬係咪都係受到神嘅感召，仲有人問︰「我成日祈禱神話唔應該有小圈子選舉，點解神嘅指引唔同，上帝係咪精神分裂？」面對大家嘅質問，Samuel惟有死撐，話因為放股票係個人嘅感召，又話自己絕對唔係將上帝擺上枱，就算支持唐唐都係佢個人嘅決定咁話喎！唔知佢講到咁，係咪真係收到科呢？