政壇：維園阿哥有難嫻姐解圍
日前工聯會以群星拱照副會長陳婉嫻遞交提名表參選黃大仙龍上選區，聲勢一時無兩，事先張揚有意狙擊嫻姐嘅「維園阿哥」任亮憲亦唔敢怠慢，尋日落區收集選民提名時，竟然失威到畀至少六至七個阿伯圍住，畀人大聲指罵佢攪亂香港同做埋啲衝擊示威。
「維園阿哥」畀人鬧到面懵懵之際，嫻姐咁啱得咁蹺路過爭取市民支持，見自己嘅「粉絲」圍攻任亮憲，佢好大方為「維園阿哥」解窘，一聲令下叫班阿伯要和平示威同唔好嘈，過多一陣班阿伯就聽聽話話離開。呢件事證明，要狙擊嫻姐都唔係咁易o架。而報名參選龍上選區嘅仲有民主黨林偉基。
