港府淪為代言人 神州彩禍日日新

賭風熾熱，地下六合彩為禍全國，不法分子奇招百出，連港府都成為「代言人」，你都咪話唔搞笑。

咁嘅，最近內地有個所謂六合彩網站，聲稱可以提供必中貼士等等，為咗增加「權威性」，仲喺網站貼出香港區徽同曾蔭權嘅相片，自稱被曾蔭權評為「香港六合彩精選網站」、「香港彩民信得過網站」。堂堂特區之首居然淪為非法六合彩網站嘅代言人，唔知煲呔曾有咩感受？

更好笑嘅係，不法分子賊喊捉賊，喺網站貼出香港警隊照片，話要嚴厲打擊非法網站，鼓勵苦主舉報六合彩騙案喎。「滅罪行動」嘅聯辦單位犀利咯，包括香港九龍馬會管理中心、香港六合彩投訴中心、香港九龍公安分局、香港中級人民法院、香港人民政府，問你服未。

本來呢，呢個網站破綻百出，根本不值一哂，弊在唔少內地同胞頭腦簡單，信以為真，咁就一啲都唔好笑咯。大家都知啦，近年內地非法六合彩賭博蔚然成風，害到唔少人沉淪賭海、家破人亡。呢，最近又有一名深圳商人輸晒成副身家，妻子拒絕復合，商人一怒之下斬殺岳父、岳母同兩名外甥，釀成一死三傷慘劇。有人形容地下六合彩賭博係害己、害人、害親友、害家庭、害民族、害國家嘅「六害彩」，真係一啲都冇講錯。

講起「六害彩」，就唔能夠唔提鼎鼎大名嘅淫賤黎，佢當年旗下公司印製嘅三份六合彩報畀人源源不絕走私北上，荼毒同胞，鼓吹賭風，發展到今日呢種遍地開花、到處結果嘅地步，佢真係居功至偉o架。

奇怪嘅係，地下六合彩幾乎變成公開運作嘅害人產業，足以禍國殃民，內地當局竟然袖手旁觀。而對於港產六合彩報北上害人，港府更加係闊佬懶理，關人個關。太一叮思疑，內地騙徒可能據此認定港府鼓勵地下六合彩，先至搵煲呔曾做代言人啩。

正如有人話齋，打擊地下六合彩其實唔係咁難嘅啫，只要兩地執法部門建立合作機制，聯手出擊，包保手到擒來喇。嗱，咪話太一叮唔提醒吖，如果當局繼續放任落去，不法分子愈來愈猖獗，難保將來唔會搵國家領導人做代言人o架，叮！