CULTUREo翕：娃娃看天下

這次找來兩名80後的娃娃玩家，及一名擁有約兩百個大頭娃娃的發燒友，分享他們對玩娃文化的看法。

擁有一雙大眼睛、外表甜美的大頭娃娃Pullip，近年成為不少80及90後青年的新寵兒，亦掀起一股玩娃文化熱潮。玩家會為娃娃命名、化妝、設計衣服，甚至打造成電影角色。社會學家崔日雄指出，玩娃文化的流行，反映年輕人透過娃娃來建立自我形象，獲取認同感和滿足感。

Misa：

最初覺得大頭娃娃的衣服同配件好靚，就買了第一個，後來發現有網友為娃娃裝扮得好靚，自己就試埋一份，愈玩愈有興趣。

Kenj：

大頭娃娃與其他娃娃最大分別，就係佢哋嘅眼神同五官精緻得多，手腳亦可隨意調校，好有真人感覺，所以玩娃嘅時候，好自然會同佢哋改個名，構思佢嘅性格及生日。

Misa：

有些較為誇張嘅裝扮，我自己於現實生活之中未必敢做，好似化smoky eyes、穿lolita衫，就會透過娃娃幫我達成心願。

崔：

年輕人喺現實生活中，有好多限制，玩娃係一種畀佢哋釋放自我嘅途徑，佢哋會將自己想做嘅事，投射於娃娃身上，透過呢種投射作用從而獲得滿足感。

Kenj：

玩娃最開心係可以將自己鍾意嘅造型放喺娃娃身上。好似我鍾意飛車黨，就設計一個飛車娃娃，我曾經改裝過爆粗band友、電影魔盜王系列入面嘅周潤發同Johnny Depp角色，因為係電影角色，朋友睇見娃娃時，投入感會大咗，自己覺得好滿足。

Jerry：

我就比較簡單，有時改裝出嚟嘅娃娃，如果人哋話好靚，我就好開心，可能呢啲就係虛榮心啦！

崔：

年輕人比較在意他人點睇，佢哋會用唔同方法建立自我形象，玩娃係其中一種。佢哋將改裝後嘅娃娃相片，上載上網與網友分享，都係希望被認同。如果被稱讚，就會令佢哋覺得好有成功感，認同自己多啲。

受訪者檔案：

Kenji：廣告人，擁有約200個大頭娃娃。玩娃年資：6年。

Misa：80後，文職。玩娃年資：4年。

Jerry：80後，從事與公仔相關之工作。玩娃年資：4-5年。

崔日雄（理工大學應用社會科學系講師）