政壇：周永新寸唐唐可有可無

香港貧富懸殊驚人，大都會除咗有幾十萬窮人外，籠屋、棺材房更充斥鬧市，每一項劣績都硬摑政府負責扶貧工作嘅政務司司長唐英年，偏偏身兼關愛基金主席嘅唐唐又分分鐘辭職唔撈選特首，但多個關愛基金嘅非官守委員嘅反應卻好搞笑，不但對唐唐離職一啲都唔覺可惜，仲踢爆唐唐大半年以來都冇乜作為，聲言「有冇佢喺度都係咁上下」。

關愛基金委員之一嘅社區組織協會主任何喜華尋日就喺電台節目《香港家書》話，煲呔曾上任以來，一直喺「無風無浪且薪高厚職下安然度過，但對於百多萬貧窮人口而言，可謂度日如年」。佢仲寸爆另一關愛基金委員胡定旭，佢話：「（胡定旭）話佢（唐唐）腳頭好，黐線o架，咁搵個算命佬咪得囉！」何認為咁講簡直係侮辱咗選舉。

另一個關愛基金福利小組委員會主席周永新不諱言，唐唐過去大半年對於基金運作影響唔係好大，只係開過幾次個多鐘頭嘅會議，好多決策都係小組委員會決定，真係邊個做主席都一樣。周永新仲話：「佢（唐唐）唔好插手仲好呀！」明寸唐唐可有可冇。